دي مجموعة أقاصيص صغيرة كدا .. هكتبها بالعامية ..
مجرد جرعة صغيرة من شوية حاجات حاسا بيها ..
(1) ألغام ..
الموضوع عامل بالظبط زي ما يكون طفل مامتو زعقتلو جامد وجري ناحية الباب بيعيط قامت قالتو "إن شالله تروح ما ترجع " وقام طالع من البيت وهوا بيجري وبيعيط برضو لحد ما حيلو إتهد من العياط .. نسي العياط خمس دقايق زي أي طفل وبدأ يلعب يتنطط يجري .
بيعمل الحاجة اللي بيحبها .. بياخد فاصل من العياط وزعيق مامتو ..
وفي نص اللعب راح كل حاجة إنفجرت .. هوا نفسو كان أول حاجة ولعت وخد رمادها الريح ..
أصل دا كان حقل ألغام .. هوا كان بيلعب هربان من كل حاجة في حاجة بيحبها .. مكانش يعرف إن دا هينفجر فيه وفي وشو وهتولع في كل حاجة حواليه ..
ومات الولد ..
المشكلة من دا كلو إن الناس كلها زعلانة إن الولد دا كان بيلعب وهوا "الله يرحمو" السبب في الدمار دا كلو ..
بس هوا السبب مش اللي زرع الألغام نفسها !!
(2) شياكة
طول عمري مؤمنة تماما إنك لازم لما تفارق حد خصوصا لو بينكو معزة وذكريات .. لازم تفارقو بشياكة ..
يعني تتكلمو وتتفقو هتعملو إيه وإزاي هتتعاملو مع بعض وأكيد تتمنوا لبعض السعادة ولو بينكو حاجة وحشة تعتذروا لبعض عليها ..
وأخيرا الوعود الزهرية بإنكو هتجيبو سيرة بعض دايما بالخير .. وهتراعو حق العشرة والعيش والملح .. وقبل دا كلو حق ربنا في بعض
"وانتي عارفه اني هراعي حقك حتي واحنا مبتكلمش .."
كلمتين إتقالولي .. وياريتهم ما إتقالولي عشان بحاول أفهمهم بقالي إسبوعين وموصلتش لحاجة !!
المهم .. نرجع
بعد الكلام دا كلو .. إستنى 48 ساعة .. هتلاقي مصر كلها "مع مراعاة فروق البلاد" بتكلم عليك وعلى كل حاجة عملتها ومعملتهاش في حق الطرف الآخر أو "الملاك الآخر"
وهتلاقي الشتايم عليك من كل صنف ولون وشكل .. لأ والغريبة إنك هتكتشف إنك كافر أو على أحسن الحالات مسلم عاصي ومرتكب للكبائر ..
وهتضطر تعمل زيي وتروح لشيخ عشان تتأكد إنك لسا على دين الإسلام ! والأهم عشان تتأكد إنك لسا بني آدم !
المشكلة بقى في دا كلو إنك هتحس بإحساس من البلادة .. والله مش هتحس إنك موجوع
كل الحكاية إنك هتبقى بتحاول تفسر وتفهم اللي حصل
والله العظيم مش هتدمع حتى .. هيبقى وشك عامل الإيموشن دا :|
(3) Note
ملحوظة مهمة جدا ..
وإنتا في خلاط أفكارك .. ومفرمة مشاعرك
وإنتا حاسس بالاإحساس والامنطق
وإنتا ضايع كدا ..
لو حسيت بذرة تأنيب للضمير على حاجة عملتها .. غلط .. مصيبة .. تلقائية في التعبير .. مكنتش واخد خوانة .. أيا كان حجم المشكلة وأبعادها
وسط دا كلو وإنتا بتبدأ تكلم مع ضميرك وتسألو إيه اللي حصل ؟
وهل أنا فعلا عملت كل دا ؟
وفجأة .. طراااااااااااااااااااااااااااااااخ !
تقوم مرزوع قلم محترم على وشك ..
..
نفس الإيموشن اللي فات :|
"إنتقامك وخصوصا لو قاسي من حد جرحك بيفوت عليه أقصى أنواع العقاب والعذاب .. وهيا عذاب الضمير "
يعني في كتير من الأوقات الإنتقام بيضيع من الواحد حقو بمعنى الكلمة .. إن لم يكن في كل الأوقات!
(4) مريضة نفسياً
طول عمري وأنا معترفة قدام نفسي وعيلتي وصحابي إني "مريضة نفسيا" ومش بكسف من الموضوع دا ولا بنكرو .. بالعكس أنا بحاول أنشر ثقافة إن المرض النفسي زي الكحة والبرد
مرض طبيعي جدا !
المشكلة لما تلاقي حد من الناس اللي قلتلهم كدا بعد فترة بياخد الإعتراف دا ذريعة ضدك .. وبيستخدمو في تبرير حاجة عملتها ..
إيموشن :|
مش عارفا .. يمكن أنا كنت غلط لما بحكي بسذاجة والمجتمع هوا اللي صح !
والله ما بقيت فاهمة حاجة :-)
.............................................................................................
إنتظروا أقاصيص (2) :D :D
I love italyyyyyyyyyyyyyyyy
ردحذفsooooooooooooo much
your welcome
and I'll visit it :)
في فرق مابين المرض النفسي والإضطراب النفسي المرض النفسي ده مرض زي باقي الأمراض وبيتاخد له أدويه وغيره وعلاج والإضطراب النفسي اللي برجحه ليكي وهو بيبقي مجرد تقلب مزاجي أو تررد أو غيره... بس
ردحذفمعاك حق .. غلبتني :-)
حذفأزال المؤلف هذا التعليق.
ردحذفحلوه اوي فكرة ان الانتقام بيفوت عليك حقك ...رائعه استمري ...
ردحذفمنورة يا ريري :*
حذفدا نورك ياموني ..انااول مره اعرف ان عندنا ناس جامده كدا ...ايه الكلام ده حلوو اوي ويدخل العقل
ردحذفحبيبتي المدونة مدونتك ..
ردحذفومعلش لو عرفتي متأخر أنا لسا مش واثقا في لغتي وأدواتي كويس
فمش بنشرها كتير :)
زى ما قولتلك :))
ردحذفمش مهم تكتبى بانهى اسلوب
المهم تخرجى الى جواكى مادام احنا مش بروفيشنال ف الكتابة :))
عجبونى ومستنية الجزء التانى بقا
وأنا أكتر منك :))
حذف