الثلاثاء، 19 مارس، 2013

الأكيد مش أكيد

كان نفس ترتيب اليوم من الشهر بس من سنة فاتت ..

إنتا كنت لابس نفس التيشرت ، كنا في نفس المكان ، كانت آخر مرة نتكلم فيها، كل حاجة من سنة كانت شبه كل حاجة دلوقتي .
إلا أنا ..

أكيد مفيش حاجة أكيدة ﻷن ذاكرتي أقرب لذاكرة السمك منها ﻷي حاجة في الدنيا ، بس الأكيد إن أنا من سنة مش شبهي دلوقتي ..

لون عنيا إغمق سنة أو سنين .. وشي جعد رغم إني لسا مش في الأربعين ..
قلبي !؟
يووووووووووه هقولك إيه ولا إيه ؟
أكيد إنتا عارف .. أو مش عارف !!
مش عارفة ..
الأكيد إن شكلي إختلف
كل كلامي الحزين بطلتو واللطم والولولة .. أكل الضوافر والدموع المستباحة ليل نهار ..
الحزن مش في دا كلو .. الحزن في القلب
سيبوا اللي في القلب في القلب وبطلو تقليب في المواجع ..


#عن صدفة حصلتلي .. أتحدث