الثلاثاء، 24 يناير 2012

وَطــني المراوغ !




بادئ ذي بدء .. أعتذر عن كبحي جماح القلم في الأيام المنصرمة .. 
وددت فقط أن أتجرد من عصبيتي الثورية حين أتحدث عن الوطن أو سموها عصبيتي العاطفية ..
ما عدت أعلم كيف أصنف هذا الوطن القابع في تفاصيلي .. القابع في ألمي وفكري وعاطفتي ..
رغبت فقد أن أهذب الحرف حتى يخرج في قالب يليق بعاطفة أقدسها بعد تقديسي لخالقي العظيم وربي الكريم ..

لا أعلم عن ماذا سوف أكتب .. ولكني وجدت القلم جذلاً في الوطن .. 
هل أتكلم عن ما حدث في مثل ذاك اليوم ؟, تجربتي الفريدة في ال25 من يناير المنصرم ..؟
كيف كنت وكيف أنا الآن ؟..  أم أتكلم عن ذكرياتٍ في الميدان آلمني وأسعدني حملها في جعبة الذاكرة !
 أم أكتب عن 25 يناير الذي يفصلني عنه بضع سويعات .. 
أم أكتب عن سنة غابرة من القمع والإستبداد قضيت بعضها بروحي وجسدي في الميدان ولكني قضيتها كلها بروحي هنا أمام نافذتي على العالم ؟
أجد أن الكلام والتفاصيل يجر بعضها بعضا لا يمكنك فصل أحدها عن الآخر .. أنت فقط تفسد الرواية إن حاولت فعل ذلك ..
كذلك لا أجد في نفسي هوى للكتابة عن العرس الثاني للديموقراطية كما أطلقو عليه ألا وهو أول جلسات مجلس الشعب !!
الجميع هنا يتابع في ترقب وحذر مصحوب بتخوف أو فرحة وعند الكثيرين مصحوب بكبرياء الإنتصار .. أكرهها 
يبدو والله أعلم أني خلقت لإعترض كما يقولون .. أنا من تلك الفئة التي يرثى لحالها إلي (لا يعجبها العجب ولا الصيام في رجب )!!!

لا أريد أن أنقض وأتفزلك في خضم هذا العالم الذي لا يشبهني بحال من الأحوال يكفي خواضا في غمار السياسة .. شبعت وأصابتني التخمة .. كبرتني هذه المدعوة سنين على عمري وأنا مولعة بالإحتفاظ بطفولتي إلى أقصى الحدود ..

ربما أنا هنا بحاجة إلى إفراغ شحنة عاطفية كبدني ضمري أو قلبي عناء حملها .. لا أعلم صدقا هل أنا أحب هذا الوطن بقلبي أم عقلي أم بضمري .. أشبعني هذا الوطن حبا وأيقظ كل خلية في جسدي وهو ينبض بداخلي ..
أشبعني حيرة .. وأشبعني قراءة .. أشبعني غيرة عليه ممن يدعون حبه وهم عن حبه ببراء !
أما أنا المتورطة فيه وبيه حد الألم أو الأمل .. أيضا ما عدت أدري !
رزقني الله قدرا "وأنا أؤمن بالله وبأقداره " أن أعشق وطنا مراوغا .. إختلط فيه الحابل بالنابل .. وإختلط فيه قلبي بعقلي ..
وإختلط فيه رجال الدين برجال السياسة وأختلط فيه حماة الوطن بقتلة الوطن ..

أحببت وطننا أهداه الكثيرين أرواحهم وأجسادهم لكني أجده رغم هذا كله يريد المزيد .. يبدو أن هذا الوطن سيتحول قريبا إلى مصاص دماء أو أنه تحول بالفعل !!

أحببت وطنا يستكثر الإعدام على طاعنيه وخائنيه !! أحببت وطننا أصابني بالجنون والفصام وكل أنواع العلل العقلية !
أحببت وطننا لم تكفهِ نور الشمس فأخد نور أعين شبابه .. ولازال مظلما ظالما آثماً !!

يا وطني الحنون يا وطن الجنون يا وطني المراوغ .. كفا ألاعيب الأطفال هذه .. سئمتها .. إن كان ذاك إختبار في حب الوطن فقد كُتبت شهادات تفوقنا بدماء أغلياء هذا الوطن .. وإن كان قدرا من الله عزل وجل فإني أشهد أنه لا إله إلا أنت اللهم إني أسألك الرضا بعد القضاء 
فإن كتبت لهذا الوطن أن تُسقى شوارع التحرير فيه بمزيد من ينابيع الدم .. فهون علينا فراقهم وأكتبهم عندك شهداء .. وإن كتبت لنا النصر بعد حين فثبت قلوبنا وأشدد أزرنا وقوِ عزائمنا .. 
كالعادة أشتقاك يا وطني .. ومهما كثرت آثامك ستبقى مزروعا في دمي ولحمي والنابض في شمالي .. أنت قدري أيها الوطن .. قدري المراوغ .. وَطــنٌي  المراوغ !
ألقاك في قلبك يا وطن ألقاك في الميدان .. :) :)

تذوقوها 
http://soundcloud.com/fairouzk/c8fzdokxlz3x


الموقع أدناه :
واحدة نازلا التحرير ومش ضمنا ترجع بيتهم تاني 




             

الاثنين، 2 يناير 2012

الأهلي والإخوان ..


أعزائي المشاهدين أهلا وسهلا بكم في الماتش الأول للشوط التاني

حم حم ماتش أول أيه وشوط تاني أيه بس !!
معلش يا جماعة أصلي مش بفهم حاجة في الكورة بس بحب جدا أشجع اللعبة الحلوة واللعبة الحلوة يعني الأهلي :D :D
وتقدر تقول كدا أهلاوية متعصبة ..

دا أسمي أماني ودي حالتي
واحدة مبتفهمش الفرق بين ضربة الجزاء والجون !! ومصمة إنها أهلاوية ومتعصبة كمان ومحسوبة على جمهور الأهلي !!
كل متعتي أني أقعد وسط خوالي وأخويا اللي بيفهمو في الكورة وبيلعبوها بس عيبهم إنهم زمالكوية !!
وأنا لا أفقه شئ في الكورة أصلا بس أسمي أهلاوية
ونتفرج عالماتش وهووووووووووووووووب الأهلي بيكسب كالعادة !!
أه وللأمانة أنا بحب الأهلي كمان عشان حماقي أهلاوي !!
هي دي بأمانة كل معلوماتي عن الكورة

بالنسبة بقى لأسم المدونة اللي هوا مش الأهلي والزمالك
فدي مش غلطة زي أول سطر وأنا بحاول أذيع الماتش كدا
بس أصلي أكتشفت أن أنا نوعي منتشر قوي
بس مش على مستوى الأهلي والزمالك لا للأسف يا ريت
على مستوى الحياة السياسية !!
إتفاجئت النهاردة أن ناس كتير هترشح الإخوان !!
ليه يا عم .. أصلو بيحب اللعبة الحلوة =))
طب ايه اللعبة الحلوة اللي بيلعبها الأخوان !! أنهم كدا كدا هيكتسحو البرلمان عشان كدا أرشحهم وخلاص
ويغيظ الناس اللي زي حلاتي اللي طالع ميتين أهاليهم في التحرير كل أما ينادي

فعلاعلاقة الناس دي بالحياة السياسية أشبه بعلاقتي مع الكورة
بيشجعو وخلاص !!
وبما أن الأخوان هيكسبو الماتش يبقى أحنا معاهم .. مهما كانو شايفين تجاوزات وأخطاء قاتلة في سياستهم
بس أشطا الهوب حلو برضك !!!

عشان كدا حبا أقولهم يا جماعة دا مش ماتش بين الأحزاب مين هيجيب كام في مين !!
أبوس إدكو أتقو ربنا في بلدكو
دا ماتش إحنا عازين الحرية تلعبو على أرض مصر !!
وكدا عمرها ما هتلاقي ملعب عدل تشوط فيه الكورة بس

مش مشكلة إتعب نفسك حبه حلوين وبص فالحزب دا والحزب دا والمرشح دا مين ودا مين والبرنامج بتاع فلان وخطة علان
تعالى على نفسك شوية يا أخي وبطل أسلوب " أنا بشجع اللعبة الحلوة دا !!"

دايما في نهاية كل مدونة بحب أحط صورة بتعبر عن المدونة ..
بس المرادي هستغل مدونتي للدعايا لتحالف الثورة مستمرة ..
الشباب اللي على رأي عمنا نجم "الورد اللي فتح في جناين مصر "  :) :)

سبتكو بالعافية ..

الإمضاء : أهلاوية مبتفهمش حاجة في الكورة



الأحد، 1 يناير 2012

أمــــــــــــاني ~




أول مدونة في أول يوم في 2012 ..
حبيت أوي أسميها على إسمي , فيا ربي إجعلي لي من إسمي نصيب ..:)

مدونتي دي هتكون بسيطة بقدر بساطة مشاعري وأمنياتي للعام الجديد ..

أكتر حاجة نفسي فيها بجد ومتأكدة إنها سبب سعاتي أو تعاستي .. قربي من حبيبي اللي مليش غيرو ربنا سبحانه وتعالى 
نفسي أكلمك أكتر وأكتر وأكتر ومتأكدة أنك هتسمعني لأنك أكتر واحد بتحبني في الدنيا وأنا كمان بحبك وعارفا إني مقصرا معاك 
بس ساعدني إني أقربلك وإهديني .. إنتا أكتر واحد عارف أماني يا رب وأيه اللي جواها الحلو والوحش :) :)

تاني حاجة نفسي فيها ربنا يديني طولت العمر لحد ما أحرر بلدي من حكم العسكر وزي ما ربنا إداني نصيب أكون في التحرير في الثورة اللي فاتت .. يديني عمر للثورة اللي جيا .. وأهم من دا ودا يديني أمل عشان خلاص أنا قربت أفيص من البلد دي @_@ تعبتني التنين!!

الحاجة رقم 3 بقى : نفسي أبدأ أشتغل أكتر على نفسي وعلى التراك اللي همشي فيه فمجال هندسة الحاسبات شغلي اللي بحبو واللي بلاقي نفسي فيه .. ربنا يوفقني ويسهلي صحبة الخير اللي تاخد بإيدي وأحط رجلي على أول الطريق ^_^


نجي بقى لدنيتي الحلوة .. أخواتي وصحابي وأغلى ناس على قلبي .. صحابي بتوع 4 اللي هيتخرجو السنادي ربنا يسعدهم كلهم إن شاء الله ونفسي كدا مينسنيش في زحمة إيامهم واللي يجوز فيهم يعزمني واللي يشتغلي يعزمني برضو ^_^ إن شالله حتى على مصاصية صغنونة هما عارفين أني بحب المصاصات <3
أحمد أبو قورة , محمد النشار ، إبراهيم عيسى , نجوان حسني , منى عوني ، مروة الحفناوي ، محمد طعيمة ، حامد عمر ، محمد لاشين ، محمد سباعي ، كامل محمد ، بيشوي صديق ، حازم خليفة
بحبكو قوي ويا رب مكونش نسيت حد .. شكرا على كل لحظة حلوة في 2011 وكل لحظة حلوة هتعيشوهالي قبل ما تمشو في 2012 ,وبعد 2012 ....................... ستووووووووووووووووووووووب أيه دا !! 
معلش يا جماعة دي مش مدونة وداع دي مدونة أماني :P 
سأبكي على أطلالكم كثيرا بس مش وقتكو خالص 

نفسي أكبر المدونة دي أكتر وأكتر وربنا يديني من البلاغة اللي يخليني أقول اللي جوايا وأضيف حاجة لأي حد بيقرالي 
نفسي أرجع أعزف كمنجة تاني .. بلاقي نفسي قوي فيها بتكلمني وأكلمها بحبها جدا ووحشتني أخر حاجة :((
نفسي زي ما دايما بقول ربنا يجعلني سبب في سعادة أي حد أكون في حياتو .. 
نفسي محدش يتوجع بسببي :|
نفسي أتني زي العصفورة كدا محدش يقصقص جناحاتي ولا يكتم صوصوتي <3 <3 


"وفرشت عشّي ريش في ريش في ريش، ومْشاغلَة، وتْوَشويش، وصوصوة؛ سوا سوا حنعيش نعيش نعيش، نعيش نعيش، نعيش، نعيش سوا" صلاح جاهين،
كل سنة وانت طيب صلاح جاهين :) :)

نفسي ونفسي ونفسي مبطلش أحلم .. نفسي تكون حدودي السما للأبد ...

سبتكو بالعافية :)