أعزائي المشاهدين أهلا وسهلا بكم في الماتش الأول للشوط التاني
حم حم ماتش أول أيه وشوط تاني أيه بس !!
معلش يا جماعة أصلي مش بفهم حاجة في الكورة بس بحب جدا أشجع اللعبة الحلوة واللعبة الحلوة يعني الأهلي :D :D
وتقدر تقول كدا أهلاوية متعصبة ..
دا أسمي أماني ودي حالتي
واحدة مبتفهمش الفرق بين ضربة الجزاء والجون !! ومصمة إنها أهلاوية ومتعصبة كمان ومحسوبة على جمهور الأهلي !!
كل متعتي أني أقعد وسط خوالي وأخويا اللي بيفهمو في الكورة وبيلعبوها بس عيبهم إنهم زمالكوية !!
وأنا لا أفقه شئ في الكورة أصلا بس أسمي أهلاوية
ونتفرج عالماتش وهووووووووووووووووب الأهلي بيكسب كالعادة !!
أه وللأمانة أنا بحب الأهلي كمان عشان حماقي أهلاوي !!
هي دي بأمانة كل معلوماتي عن الكورة
بالنسبة بقى لأسم المدونة اللي هوا مش الأهلي والزمالك
فدي مش غلطة زي أول سطر وأنا بحاول أذيع الماتش كدا
بس أصلي أكتشفت أن أنا نوعي منتشر قوي
بس مش على مستوى الأهلي والزمالك لا للأسف يا ريت
على مستوى الحياة السياسية !!
إتفاجئت النهاردة أن ناس كتير هترشح الإخوان !!
ليه يا عم .. أصلو بيحب اللعبة الحلوة =))
طب ايه اللعبة الحلوة اللي بيلعبها الأخوان !! أنهم كدا كدا هيكتسحو البرلمان عشان كدا أرشحهم وخلاص
ويغيظ الناس اللي زي حلاتي اللي طالع ميتين أهاليهم في التحرير كل أما ينادي
فعلاعلاقة الناس دي بالحياة السياسية أشبه بعلاقتي مع الكورة
بيشجعو وخلاص !!
وبما أن الأخوان هيكسبو الماتش يبقى أحنا معاهم .. مهما كانو شايفين تجاوزات وأخطاء قاتلة في سياستهم
بس أشطا الهوب حلو برضك !!!
عشان كدا حبا أقولهم يا جماعة دا مش ماتش بين الأحزاب مين هيجيب كام في مين !!
أبوس إدكو أتقو ربنا في بلدكو
دا ماتش إحنا عازين الحرية تلعبو على أرض مصر !!
وكدا عمرها ما هتلاقي ملعب عدل تشوط فيه الكورة بس
مش مشكلة إتعب نفسك حبه حلوين وبص فالحزب دا والحزب دا والمرشح دا مين ودا مين والبرنامج بتاع فلان وخطة علان
تعالى على نفسك شوية يا أخي وبطل أسلوب " أنا بشجع اللعبة الحلوة دا !!"
دايما في نهاية كل مدونة بحب أحط صورة بتعبر عن المدونة ..
بس المرادي هستغل مدونتي للدعايا لتحالف الثورة مستمرة ..
الشباب اللي على رأي عمنا نجم "الورد اللي فتح في جناين مصر " :) :)
سبتكو بالعافية ..
الإمضاء : أهلاوية مبتفهمش حاجة في الكورة
جميييييل جدا
ردحذف^_^
ومن اول لحظة و جون و جون و جون و جووووون
^_^
انا ماليش في الكورة و مش بشجعها كمان
عندك حق فيه ناس كتير رايحة ناحية اللي نعرفه احسن من اللي منعرفهوش
وانا إذ تفوجئت بالموضوع دا زيي زيك برضه
^_^
وقولت ايه العالم الليبرالية دي اللي رايحه تشجع الأهلي
:)
بس يلا خير , , , الشعب المصري بيقول الكسل حلو برضيك
ومحدش عارف الخير فين
كويس انك بدأتي تكتبي حاجة ليها علاقة بالشارع :)
ردحذفانا متفائل خير
اية موضوع نجم دا كمان .. هو اللي قال الورد اللي فتح في جناين مصر ؟؟؟
منور يا فتوووووووووح يا أبو المفاتيح
ردحذفوفعلا مش عارفا أعمل ايه في الناس دي أموتهم يعني !!
وزي ما حضرتك بتقول دايما !!
خير خير خير
محدش عارف الخير فين
وربنا يحمي مصرنا العزيزة :)
حامد !!
ردحذففيك أيه أه قال كدا
صباح الخير على ولادك صباح الياسمين والفل
يعيشو ويفنو حسادك ويسقوهم كسات المر
ومن هنا جت صباح الخير على الورد اللي فتح في جناين مصر :)
لا طبعا هو مقالش كده لفظا انا اصلا مش بحب الراجل ده ولو كان قال كده كنت هزعل :) الحمد لله
ردحذفهههههههههههههههههههههههههه حامد يا جماعة
ردحذفمنور يا حامد =))
ماله حامد يا اختي ..
ردحذفعموما انا مش بحب الراجل ده بحس انه ندبة علي وجة مصر
بعد صدمتي الميدانيه النهارده في عقر داري
ردحذفوبعد ما بح صوتي مع بشر اخر ما يطيقونه هو ان تكون الثوره مستمره
وبعد ما قريت النوت العسوله دي اللي اخيرا قريتلك حاجه علي الارض
عايز اقولك ان زي ما الثوره اللي قام بيها الشباب والتف حواليهم الشعب -معظمه-ستظل الثوره مستمره
الثوره مستمره .. لفظ
الثوره مستمره .. ليست انتماء حزبي
الثوره مستمره .. صوتي ف الانتخابات بكره
good steps
ردحذففكر جيد .. أحييكي عليه ...
ردحذفوكنت أنتظر منك .. أن تنصحي الزمالكوية .. اللي بقو زمالكوية لمجرد إنهم مش بيحبوا الأهلي ...
ابنتي العزيزة ( القصيرة) اللي أنا مصر إنها بتفكرني بيا في مرحلة من مراحل عمري المهمة ... أحسنتي .. وأبدعتي ...
مع شوية تحامل صغيرين
على فكرة يا بشمهندس مفيش زمالكوية بيشجعو الزمالك عشان بيكرهو الأهلي :D
ردحذفإلا أغلبية الناس اللي بترشح حزب النور بترشحهم عشان بيكرهو الإخوان "دا التشبيه الصح ":D
أحمد أبو قورة !!
ردحذفمهما كان مش هقدر أوصفلك صدمتي في أصدقاء عمري اللي إكتشفت إنهم بيشجعو اللعبة الحلوة :D :D
قلم على وشي =))